Jab qata ki musāfat e shab āftāb ne
Jab qata ki musāfat e shab āftāb ne
Jalwa kiya sahar ke rukhe behijāb ne
Dekha sūwe falak Shahe gardūn rakāb ne
Murh kar sada rafīqo Ko di us janāb ne
Ākhir hai rāt hamd o sanāye Khuda karo
Utho farīzaye sahri ko ada karo
Hān ghāziyon ye din hai jidāl o qitāl ka
Yān khūn bahega āj Mohammad ki āl ka
Chehra khushi se surkh hai Zahra ke lāl ka
Guzri shabe firāq din āya visāl ka
Hum wo hain gham karenge malak jin ke wāstey
Rātein tadap ke kāti hai is din ke wāstey
Ye sunke bistaron se uthe wo Khuda shinās
Ek ek ne zebe jism kiya fakhira libās
Shane muhasino mein kiye sab ne be hirās
Bāndhe amāme āye imāme zaman ke pās
Rangīn abāyein dosh pe kamre kasey huwe
Muskh o zibād o itr mein kapde basey huwe
Khaime se nikle Shay ke azīzāne khush khisāl
Jin mein kayi thay Hazrate Khairun nisa ke lāl
Qasim sa gul badan Ali Akbar sa khush jamāl
Ek jā Aqīl o Muslim o Jafar ke nau nihāl
Sab ke rukhon ka nūr sipahre barīn pa tha
Athāra āftābon ka ghuncha zamīn pa tha
Nāgāh charkh par khate abyaz huwa ayān
Tashrīf jānemāz pe lāye Shahe zamān
Sajjāde bich gaye aqabe Shāhe ins o jān
Saute Hasan se Akbar e Mahrūh ne di azān
Har ek ki chashm ānsuon se dab daba gayi
Goya sada Rasūl ki kāno mein āgayi
Nāmūse Shāh rotey thay khaime mein zār zār
Chupke khadi thi sahn mein bāno e nāmdār
Zainab balāyein leke ye kahti thi bār bār
Sadqe namāziyon ke muazzin ke main nisār
Karte hain yūn sana o sifat Zul Jalāl ki
Logon azān suno meri yousuf jamāl ki
Ye husn e saut aur ye qirat ye shad o madd
Haqqa ke afsahul fusuha thay inhi ke jadd
Goya hai lahn e Hazrat e Dawūde ba khiradd
Ya Rabb rakh is sadā ko zamāne mein tā abadd
Shu’be sada mein pankhadiyān jaise phūl mein
Bul bul chahak raha hai riyāz e Rasūl mein
Saf mein huwa jo nāraye qad qāmatis salāt
Qaim huwi namaaz uthey Shahe qainaat
Wo nūr ki safein wo musalli falak sifāt
Sardār ke qadam ke taley thi rahe nijāt
Jalwa tha ta ba arshe mu’alla Hussain ka
Mus haf ki lauh thi ke musalla Hussain ka
Qurān khula huwa ke jama’at ki thi namāz
Bismillah āgey jaise ho yūn thay Shahe hijāz
Satrein thi ya safein aqab e Shahe sarfarāz
Karti thi khud namāz bhi inki adā pe nāz
Sadqe sahar bayāz pe bainas sutūr ki
Sab āyatein thi mus hafe nātikh ki nūr ki
Dunya se uth gaya wo qayām aur wo qaūd
Inke liye thi bandagi wajibul wujūd
Wo ajz wo tawīl ruku aur wo sujūd
Ta’at mein nīst jāntey thay apni hast o būd
Tāqat na chalne phirne ki thi hāth pāon mein
Gir gir ke sajde karte thay teghon ki chaon mein
Farigh huwe namāz se jab qibla o anām
Āye musāfahe ko jawānān e tashnakām
Chume kise ne dast e Shahinshāh e khās o ām
Ākhein miley kisi ne qadam par ba ehterām
Kya dil thay kya sipaah e rashīd o sayīd thi
Ba ham mu’anaqe thay ke marne ki eid thi
Zāri thi ilteja thi munajāt thi idhar
Wān sar kashi o zulm o ta’addi o shor o shar
Kahta tha ibne Sa’ad ye jā jā ke nahr par
Ghāton se hoshiyār tarāyi se ba khabar
Do roz se hai tashna dahani Hussain ko
Hān martey dam bhi dījiyo na pani Hussain ko
Baithey thay jānemāz pe Shahe falak sarīr
Nāgāh qarīb āke girey tīn chār tīr
Dekha har ek ne mudhke sūwe lashkar e kasīr
Abbas uthey tol ke shamshīr be nazīr
Parwāne thay sirāj e imāmat ke nūr par
Rokey sipar huzūr karāmat zahūr par
Akbar se mudhke kahne lage Sarware zamān
Bāndhe hai sarkashi pa kamar lashkare girān
Tum jāke kahdo khaime mein ye ay pidar ki jān
Bachon ko leke sahn se hatt jāye bibiyān
Ghaflat mein tīr se koi bacha talaf na ho
Darr hai mujhe ke gardane Asghar hadaf na ho
Kahte thay ye pisar se Shahe āsmān sarīr
Fizza pukāri deordhi se ay khalq ke amīr
Hai hai Ali ki betiyān kis jā ho goshgīr
Asghar ke gahwāre tak ākar girey hain tīr
Garmi se sāri rāt ye ghut ghut ke roye hain
Bachey abhi tou sard hawā pāke soye hain
Bāqir kahīn parha hai Sakina kahīn hai ghash
Garmi ki fasl ye tab o tāb aur ye atash
Ro ro ke sogaye hain saghīrane māhwash
Bachon ko leke yaan se kahān jāye fāqa kash
Ye kis khata pe tīr piya pe barastey hain
Thandi hawa ke wāstey bachey tarastey hain
Uthey ye shor sunke Imāme falak viqār
Deordhi tak āye dhālon ko roke rafīq o yār
Farmāya mudhke chaltey hain ab bahre kārzār
Kamre kaso jihād pe mangwāo rāhwār
Dekhein fizā behisht ki dil bāgh bāgh ho
Ummat ke kām se kahīn jaldi firāgh ho
Khaime mein jāke Shay ne ye dekha haram ka hāl
Chahre tou faqq hai aur…
Zainab ki ye dua thi ke ay Rabbe Zuljalāl
Bach jāye is fasād se khairun nisa ka lāl
Bano e naik nām ki khaiti hari rahey
Sanndal se māng bachon se godhi bhari rahey
Boley qarīb jāke Shahe āsmān janāb
Muztar na ho dua’en hain tum sab ki mustajāb
Maghrūr hain khata pe ye sab khanuma kharāb
Khud jāke mein dikhāta hūn inko rahe sawāb
Mauqa nahi bahan abhi faryād o āh ka
Lāo tabarrukāt Risālat panāh ka
Merāj mei Rasūl ne pahna tha jo libās
Kashti mein lāyi Zainab usey Shahe dīn ke pās
Sar par rakha amāmae Sardāre haq shinās
Pahni qabāye pāk Rasūle falak asās
Bar mei durust o chust tha jāma Rasūl ka
Rūmāl Fātima ka amāma Rasūl ka
Kapdon se ārahi thi Rasūle zaman ki bu
Dūlha ne sūnghi hogi na aisi dulhan ki bu
Hyder ki Fatima ki Hussain o Hasan ki bu
Phaili huwi thi chār taraf Panjetan ki bu
Lut ta tha itr wādi ambar sarisht mein
Gul jhumtey thay bāgh mein Rizwān behisht mein
Poshāk sab pahan chukey jis dam Shahe zaman
Lekar balāein bhāi ki ronay lagi bahan
Kehti thi hai aaj nahi Hyder o Hasan
Amma kahān se laye tumhe ab ye be watan
Rukhsat hai ab Rasool ke yūsuf jamāl ki
Sadqe gayi balein tou lo apne lāl ki
Hathyār idhar laga chuke Moula e khās o ām
Tayyār udhar huwa alam e Sayyide anām
Duāein māngti gird thi saidāniyān tamām
Roti thi thāmey chobe alam khwāhare imām
Teghein kamar mei dosh pe shamley padey huwe
Zainab ke lāl zere alam ā khade huwe
Gah mā ko dekhte thay kabhi jānibe alam
Na’ra kabhi ye tha ke nisār e Shahe umam
Karte thay dono bhai kabhi mashware baham
Āhista pūchtey kabhi ma se wo zī hasham
Kya qasd hai Alliye wali ke nishān ka
Amma kise milega alam nāna jān ka
In nanhe nanhe hāthon se uthega ye alam
Chotey qadon mein sabse sino mein sabho se kam
Nikle tano se sibte Nabi ke qadam pe dam
Ohda yahi hai bas yahi mansab yahi hasham
Rukhsat talab agar ho tou ye mera kām hai
Mā sadqe jāye āj tou marne mein nām hai
Phir tum ko kya buzurg thay jo fakhre roz gār
Zeba nahi hai wasf e izāfi pe iftekhār
Johar wo hai jo taegh karey āp āshkār
Dikhlādo āj Hyder o Jāfar ki kārzār
Tum kyon kaho ke lāl Khuda ke wali ke hain
Faujein pukāre khud ke nawāse Ali ka hain
Ab jisko tum kaho usey dein fouj ka alam
Ki arz jo salāh Shahe āsmān hasham
Farmāya jabse uthgayi Zahra e ba karam
Us din se tumko mā ki jagah jāntey hain hum
Malik ho tum buzurg koi ho ke khurd ho
Jisko kaho usiko ye ohda sipard ho
Boli bahan ke āp bhi tou lein kisi ka nām
Hai kis taraf tawajjo e Sardar o khās o ām
Gar mujhse poochtay hain Shahe āsmān maqām
Quran ke bād hai tou Ali hi ka kuch kalām
Shaukat mein qadd mein shān mein humsar nahi koi
Abbas e nāmdār se behtar nahi koi
Āshiq ghulām khādim e derīna jān nisār
Farzand bhai zīnate pehlu wafa shi’ār
Jarrār yādgār e pidar fakhre rozgār
Rāhat rasā mutī o namudār o nāmdār
Safdar hai sher dil hai bahadur hai naik hai
Bemisl saekdon mein hazaron mein aik hai
Ākhon mein ashk bhar ke ye boley Shahe zaman
Hān thi yahi Ali ki wasiyyat bhi ay bahan
Acha bulāyein aap kidhar hai wo saff shikan
Akbar chacha ke pās gaye sunke ye sukhan
Ki arz intezār hai Shahe ghuyūr ko
Chaliye phuphi ne yād kiya hai huzūr ko
Abbas āye hāthon ko jordhe huzūr e Shāh
Jao bahan ke pās ye bola wo dīn panāh
Zainab wahin alam liye āyi ba izzo jāh
Boley nishān ko leke Shahe arsh bārgāh
Inki khushi wo hai jo riza Panjetan ki hai
Lo bhai lo alam ye ināyat bahan ki hai
Munh karke suwe qabre Ali phir kiya khitāb
Zarre ko āj kardiya Moula ne āftāb
Ye arz khāksār ki hai Ya Abu Turāb
Āqa ke āgey hūn mein shadath se bahre yāb
Sar tan se ibne Fatima ke ru baru girey
Shabbir ke pasīne pe mera lahu girey
Ye sunke āyi zaojaye Abbas e nāmwar
Shaohar ki simpt pehle kinkhiyon se ki nazar
Lī sibte Mustafa ki balāyein ba chashme tar
Zainab ke gird phirke ye boli wo nauhagar
Faiz āp ka hai aur tasadduq Imām ka
Izzat badi kanīz ki rutba ghulām ka
Sar ko laga ke chgāthi se Zainab ne ye kaha
Tu apni māng kokh se thandi rakhe sada
Ki arz mujhse lākh kanīzein hūn tou fida
Bano e nāmwar ko suhāgan rakhe Khuda
Bachey jiye taraqqiy e iqbal o jāh ho
Sāye mein āp ke Ali Akbar ka byāh ho
Nāgāh ākey bāli Sakina ne ye kaha
Kaisa hai ye hujūm kidhar hai mere chacha
Ohda alam ka unko mubārak karey Khuda
Logon mujhe balāyein tou lene do ek zara
Shaukat Khuda badhāye mere ammu jān ki
Mein bhi tou dekhūn shān Ali ke nishān ki
Abbas muskura ke pukārey ka āo āo
Ammu nisār pyās se kya hāl hai batāo
Boli lipat ke wo ke meri mashq lete jāo
Ab tou alam mila tumhein pani mujhe pilāo
Tohfa na koi dījiye na in’ām dījiye
Qurbān jāon pāni ka ek jām dījiye
Nāgāh badhey alam liye Abbas e bā wafa
dauRe sab Ahle Bayt khule sAr, barahna pa
Hazrat ne hāth utha ke ye ik eik se kaha
Lo Alwida ay haram e pāk e Mustafa
Subhe shab e firāq hai pyāron ko dekh lo
Sab mil ki dūbte huwe tāron ko dekh lo
Shay ke qadam pe Zainab e zār o hazīn giri
Bano pachād kha ke pisar ke qarīn giri
Kulsūm thar thara ke barūhe zamīn giri
Bāqir kahin gira tou Sakina kahīn giri
Ujda chaman har ek gul tāza nikal gaya
Nikla alam ke ghar se janāza nikal gaya
Nāgāh udhar se tīr chale jānibe Imām
Ghoda bada ke āp ne hujjat bhi ki tamām
Nikle idhar se Shay ke rafiqān e tashnakām
Be sar huwe paron mein sarā ne sipāh e shām
Bāla kabhi thi taegh kabhi zer e tang thi
Ek ek ki jang mālik e ashtar ki jang thi
Allah re Ali ke nawāson ki kārzār
Dono ke nichey thay ke chalti thi zulfiqār
Shāna kata kisi ne jo roka sipar pe wār
Ginti thi zakhmiyon ki na kishton ka tha shumār
Utney sawār qatl kiye thodi daer mein
Dono ke ghodey chup gaye lāsho ke dhaer mein
Kis husn se Hasan ka jawāne hasīn ladā
Ghir ghir ke sūrate asad e khushmgīn ladā
Do din ki bhook pyās mein wo mahjabīn lada
Sahrā ulat ke yūn koi dulha nahi lada
Hamle dikha diye asad e kirdgār ke
Maqtal mein sūye arzak e shāmi ko mār ke
Chamki jo taegh Hazrate Abbas e arsh jāh
Rūhul amīn pukārey ke Allah ki panāh
Dhālon mein chup gaya pisar e sād ru siyāh
Kushton se band ho gayi aman o amān ki rāh
Jhapta jo sher shoakh mein darya ki saer ke
Le li tarāyi taeghon ki moujon ko phaer ke
Be sar huwe muwakkil e sar chashma e furāt
Hal chal mein misl e mouj safon ko na tha sabāt
Darya mein girke fout huwe kitne bad sifāt
Goya habāb hogaye thay nuqta e hayāt
Abbas bhar ke mashk ko yoon tashnalab laday
Jis tarah naharwān mein amīr e arab laday
Āfat thi harb o zarb e Ali Akbar e diler
Ghusse mein jhapte ser pe jaise garsina sher
Sab sar buland past zabardast sab thay zer
Jangal mein chār simpt huwe zakhmiyon ke dher
Sirān ke utre tan se jo thay rann chadhey huwe
Abbas se bhi jang mein kuch thay badhey huwe
Talwārein barsi subh se nusfun nihār tak
Hilti rahi zamīn laraztey rahey falak
Kāmpa kiye paron ko simte huwe malak
Na’rey na phir wo thay na wo taeghon ki thi chamak
Dhālon ka daur barchiyon ka auj ho gaya
Hangām e zuhr khātema e fauj ho gaya
Lāshe sabho ke sibte Nabi khud uthāke lāye
Qatil kisi shahīd ka sar kātne na paye
Dushman ko bhi na dost ki furqat Khuda dikhāye
Farmātey thay bichad gaye sab hum se hai haye
Itney pahād gir padey jis par wo kham na ho
Gar sou baras jiyūn tou ye majma baham na ho
Kham hogaye ye dāgh uthake Imāme dīn
Jhuk kar bana hilāl e Nabi ka māhe jabīn
Yūn dard mein tadap ke kiya nālaye hazįn
Hilne lage pahād larazne lagi zamīn
Āyi jigar ko tāb na is wāredāt ki
Khushki mein lagi doobne kashti hayāt ki
Jab saff kashi ki dhūm huwi qatl gāh mein
Taswīr e marg phir gayi sab ki nigāh mein
Dūbe rafīq e yūsuf e dīn haq ki chāh mein
Daftar khula ajal ka Hussaini sipāh mein
Jānbāziyān dikhāke jari nām kar gaye
Khāke shifa pa nūr ke dāne bikhar gaye
Jis waqt āmad āmade saif e Khuda huwi
Hal chal padi har ek ke dar pe qaza huwi
Nābūd zindagi huwi hasti fana huwi
Himmat dilon ke jism se quwwat juda huwi
Labrez hokey umr ke sāghar chhalak gaye
Kāmpi zamīn pahād jagah se sarak gaye
Maidān mein jab riyāze Hussaini khizān huwa
Dunya se kārwān Shahe dīn ka rawān huwa
Darya e khūn mein gharq har ek naujawān huwa
Hamshakle Mustafa bhi shahīdey sinān huwa
Rotey thay Shāh lasho mein tanha khade huwe
Thay khāk par kaleje ke tukde padey huwe
Garmi ka roz jang ki kyon kar karūn bayān
Darr hai ke misl e shama na jalne lage zabān
Wo lū ke al hazar wo harārath ke al amān
Rann ki zamīn tou surkh thi aur zard aasmaan
Aab e khunukh ko khalq tarasti thi khaak par
Goya hawa se aag barasti thi khāk par
Wo lū wo āftāb ki hiddat wo tāb o tab
Kāla tha rang dhūp se din ka misāl e shab
Khud nahr e alqama ke bhi sūkhey huwe thay lab
Khaime jo thay hibābon ke tap te thay sab ke sab
Udhti thi khāk khushk tha chashma hayāt ka
Khoula huwa tha dhūp se pāni furāt ka
Jhīlon se chār pāye na uthte thay tāba shām
Maskan mein machliyon ke samandar ka tha maqām
Āhu jo kahile thay tou chītey siyāh fām
Patthar bhi sab pighal gaye thay misl e moum khām
Surkhi udhi thi phūlon se sabzi gayāh se
Pāni kuwein mein utra tha sāye ki chāh se
koson kisi shajar mein na gul thhe na barg o bār
ek ek nakhal jal rahā thā sūrat e chinār
hanstā thā koi gul na lahaktā thā sabzazār
kāntā hui thi sūkh ke har shākh e bār dār
garmi ye thi ki zīst se dil sab ke sard thhe
patte bhi masle e chehara e madqūq zard thhe
girdāb par thā shola e javālā kā gumān
angāre thhe habāb to pāni sharar fishān
munh se nikal parhi thi har ek mauj ki zabān
tah par thhe sab nihang magar thi labon pe jān
pāni tha āg garmi e roz hisāb thi
māhi jo sīkh e mauj tak aayi kabāb thi
aaina e falak ko na thi tāb o tab ki tāb
chhipane ko barq chāhati thi dāman e sahāb
sab ke sivā thā garm mizājon ko iztirāb
kāfūr e subah Dhūndhtā phirtā thā āftāb
bhadaki thi āg gumbad e charkh e asīr mein
bādal chhipe thhe sab kurrah e zamharir mein
Sher uthte thay na dhūp ke mārey kachād se
Aahu na munh nikaalte thay sabz zār se
Āina mahr ka tha muqaddar ghubār se
Gardūn ko tapp chadi thi zamīn ke bukhār se
Garmi se muztarib tha zamāna zamīn par
Bhun jata thā jo girta tha dāna zamīn par
Ābe rawān se munh na uthate thay jānwar
Jangal mein chītey phirtey thay ta’ir idhar udhar
Mardam thay saath pardon ke andar araq mein tar
Jis khana e mizā se nikalti na thi nazar
Gar chashm se nikal ke tahar jāye rāh mein
PaRh jāye lākh ābley pāye nigāh mein
Is dhūp mein khade thay akayle Shahe umam
Na dāman e Rasūl tha na sāya e alam
Oudi thi lab zabān mein kānte kamar mein kham
Sholay jigar se āh ke uthti thi dam badam
Be āb tīsra tha jo din mehmān ko
Hoti thi baat bāt mein miknat zabān ko
Kahta tha ibne sa’ad ke ay āsmān janāb
Bayyat jo kījiye ab bhi tou hāzir hai jāme āb
Farmātey thay Hussain ke ay khānuma kharāb
Darya ko khāk jānta hai ibne Bu Turāb
Fāsiq hai pās kuch tujhe Islām ka nahi
Āb e taba ho ye tou mere kām ka nahi
Garjum ka nām lūn tou abhi jām leke āye
Kausar yahīn Rasūl ka ehkām leke āye
Rūhul amīn zamīn pa mera nām leke āye
Lashkar malak ka fatah ka paighām leke āye
Chāhūn jo inqilāb tou dunya tamām ho
Ulte zamīn yūn ke na kūfa na shām ho
Farmāke ye nigāh jo ki suwwe zulfiqār
Tharrāke pichley pāon hata wo sitam shi’ār
Mazlūm par safon se chaley tīr beshumār
Āwāz e kous harb huwi āsmān ke pār
Naize uthake jang par aswār tul gaye
Kāley nishān sipāh e saeron mein khul gaye
Jab rann mein taegh toul ke Sultān e dīn badhey
Geethi ke thām lene ko rūhul amīn badhey
Manind sher e haq kahin tahre kahin badhey
Goya Ali ulat te huwe āstīn badhey
Jalwa diya jari ne urūse musūf ko
Mushkil kusha ki taegh ne chorda ghilāf ko
Allah re taezi o barsh is shola rang ki
Chamki sawār par tou khabar lāyi tang ki
Pyāsi faqat lahu ki talabgār jang ki
Hājat usey na sān ki thi aur na sang ki
Khoon se falak ko laashon se maqtal ko bharti thi
Sou bār dam mein charkh pe chadhti utarti thi
Sīne pe chal gayi tou kaleja lahu huwa
Goya jigar mein maut ka nakhan faru huwa
Chamki tou al amān ka ghul chār su huwa
Jo iske munh pa āgaya be ābru huwa
Rukta tha ek waar na das se na pānch se
Chehre siyāh hogaye thay is ki ānch se
Bichh bichh gayīn safon pe safein wo jahān chali
Chamki tou is taraf idhar āyi wahān chali
Dono taraf ki fouj pukāri kahān chali
Is ne kaha idhar wo pukāra yahān chali
Munh kis taraf hai taegh zanon ko khabar na thi
Sar gir rahe thay aur tanon ko khabar na thi
Allah re khauf taegh e Shahe kaināt ka
Zehr ah tha aab khauf ke mārey furāt ka
Darya mein hāl ye tha har ek bad sifāt ka
Chara farār ka tha na yāra sabāt ka
Ghul tha ke barq girti hai har dar’a posh par
Bhago Khuda ke kahr ka darya hai josh par
Har chand machliyān thi zira posh sar basar
Munh kholey chipti phirti thi lekin idhar udhar
Bhāgi thi mauj chordh ke girdāb ki sipar
Thay tah nashīn nahang ubhartey na thay magar
Darya na tham ta khauf se is barq o taab ke
Lekin padey thay pāon mein chhāley hubāb ke
Phir tou ye ghul huwa ke duhayi Hussain ki
Allah ka ghazab hai ladāyi Hussain ki
Darya Hussain ka hai tarāyi Hussain ki
Dunya Hussain ki hai Khudāyi Hussain ki
Beda bachaya āp ne tūfan se Nūh ka
Ab rahm wāsta Ali Akbar ki rūh ka
Akbar ka nām sunke jigar par lagi sinā
Ānsū bhar āye rok li rahwār ki ‘inā
Mudh kar pukārey lāshe pisar ko Shahe zamā
Tum ne na dekhi jang meri ay pidar ki jān
Qasmein tumhari rūh ki ye log dete hain
Lo ab tou zulfiqār ko hum rok dete hain
Āyi nidāye ghaib ke Shabbīr marhaba
Is hāth ke liye thi ye shamshīr marhaba
Ye ābru ye jang ye tauqīr marhaba
Dikhlaadi maa ke doodh ki taaseer marhaba
Ghālib kiya Khuda ne tujhe kaināt par
Bas khatima jihād ka hai teri zāt par
Bas ab na kar wigha ki hawas ay Hussain bas
Dam le hawa mein chand nafas ay Hussain bas
Garmi se hāmpta hai faras ay Hussain bas
Waqte namāz e asr hai bas ay Hussain bas
Pyāsa lada nahi koi yūn isdehām mein
Ab ehtemām chāhiye ummat ke kām mein
Labbaik kahke taegh rakhi Shay ne miyān mein
Palti sipāh āyi qayāmat jahān mein
Phir sarkasho ne tīr milāye kamān mein
Phir khul gaye lipat ke pharere nishān mein
Bekas Hussain zulm shi’aron mein ghir gaye
Moula tumharey lākh sawaron mein ghir gaye
Sīne pe sāmne se chaley das hazār tīr
Chhāthi pe lag gaye kayi sou ek bār tīr
Pahlu ke pār barchiyān sīne ke pār tīr
Padhtey thay das jo khainchte thay tan se chār tīr
Yūn thay khudang Zille Ilāhi ke jism par
Jis tarha khār hoti hai sahi ke jism par
Chaltey thay chār simpt se bhāley Hussain par
Tūte huwe thay barchiyon wāley Hussain par
Qatil thay khanjaron ko nikāley Hussain par
Ye dukh Nabi ki godh ke paley Hussain par
Tīr e sitam nikālne wāla koi nahin
Girtey thay aur sambhālne wāla koi nahin
Zakhmo se chūr chūr huwa Fatima ka lāl
Sarde riyāz Ahmad o Hyder huwa nidhāl
Chehre pa khūn mal ke basad hasrat o malāl
Ki arz Shay ne shukr hai ay Rabb e Zuljalāl
Bachpan se roz o shab thi yahi ārzu mujhe
Ya Rabb tere karam ne kiya surkhuru mujhe
Is hāl se jo saif ki shiddat huwi siwa
Sadma huwa juda ta’ab tashnagi juda
Āshista rahwār se Hazrat ne ye kaha
Ab waqt hai wida ka ay asb e ba wafa
Jangal mein ghar Batūl ka lut ta hai Zuljanāh
Ab sāth ek umr ka chut ta ha Zuljanāh
Ay khush kharām ab na bachega tera sawār
Ab ye gulu e khushk hai aur taegh e ābdār
Ab lāsh par gharīb ke daudeinge rahwār
Pāmāl hoga ab Shahe mardon ka gul’ezār
Baithega sīna e pisar e Bu Turāb par
Qatil dharega pāon Khuda ki kitāb par
Zalim mere galey pa jo khanjar phiraega
Tujh se ye hāl qahr ka dekha na jāega
Nāla haram ka hashr zamāne mein lāega
Farte gham o alam se jigar thar tharrāega
Ab hoga sāmna qalaq o izterār ka
Naize pe sar chadhega tere shahsawār ka
Lākhon mein ek bekas o dilgīr hai hai
Farzand e Fatima ki ye tauqīr hai hai
Bhāley wo aur pahlu e Shabbīr hai hai
Wo zahr mein bhujāye huwe tīr hai hai
Ghussey mein thay jo fauj ke sarkash bharey huwe
Khāli kiye Hussain pe tarkash bharey huwe
Wo gard thi jo bhāgtey phirtey thay waqt e jang
Ek sangdil ne pās se māra jabīn pa sang
Sadme se zard hogaya sibt e Nabi ka rang
Māthey pa hāth tha ke galey par laga khudang
Thāma gala janāb ne māthey ko chordh ke
Nikla woh tīr halq e mubārak ko todh ke
Likha hai tīn bhāl ka tha nāwake sitam
Munh khul gaya ulat gayi gardan ruka jo dam
Khainchi sari galey ki taraf se ba chashme nam
Bhalein nikaley pusht ki jānib se hokey kham
Ubla jo khūn nikalta huwa dam tahar gaya
Chullu rakha jo zakhm ke nichey tou bhar gaya
Girtey hain ab Hussain faras par se hāi ghazab
Nikli rikāb pāye mutahhar se hai ghazab
Pahlu shigāfta huwa khanjar se hai ghazab
Ghash mein jhukey amama gira sar se hai ghazab
Qura’an rahle zeen se sar e farsh gir padha
Dīwār e Ka’ba baith gayi arsh gir padha
Gir kar kabhi uthey kabhi rakha zamī pa sar
Ugla kabhi lahu tou sambhala kabhi jigar
Hasrat se ki khayām ki jānib kabhi nazar
Karwat kabhi tadap ke idhar li kabhi udhar
Uth baithey jab tou zakhm se barchi ke phal girey
Tīr aur tan mein gadd gaye jab munh ke bhal girey
Jangal mein āyi Fatima Zahra ki ye sada
Ummat ne mujhko lūt liya wā Mohammada
Is waqt kon haqq e mohabbat karey ada
Hai hai ye zulm aur dou ālam ka muqtara
Unnīs sou hai zakhm taney chāk chāk par
Zainab nikal Hussain tadapta hai khāk par
Zahra idhar tadap ke giri aur haram udhar
Qatil ne taegh phaer di Sayyad ke halq par
Hātif ne āsmān se sada di pukār kar
Faryād kat gaya pisar e Fatima ka sar
Be jān lab e furāt e Shahe tashna lab huwa
Māra gaya Imāme zamān tou ghazab huwa
Dekha jo Ahlebait e Nabi ne utha ke sar
Naizey pe āftāb e Imāmat pada nazar
Daude saron pa khāk udhātey ba chashme tar
Dekha ye hāl jab sarey bālīn huwa guzar
Taza lahu rawān hai taney pāsh pāsh se
Takbīr ki sada chali āti hai lāsh se
Pardah ulat ke binte Ali nikli ba chashm e tar
Larzān qadam khamīda kamar gharke khūn jigar
Charon taraf pukārti thi sar ko pīt kar
Ay Karbala bata tera mehmān hai kidhar
Amma qadam ab uthte nahi tashnakām ke
Pahuncha dou lāsh par mere bazu ko thām ke
Bhayya mein ab kahān se tumhein lāon kya karūn
Kya kahke apne dil ko mein samjhāun kya karūn
Kiski duhāyi dūn kisey chillāon kya karūn
Basti parāyi hai mein kidhar jāon kya karūn
Dunya tamām ujad gayi vīrana ho gaya
Baithūn kahān ke ghar tou azākhana ho gaya
Hai hai tumhārey aagey na khwāhar guzar gayi
Bhayya batāo kya tahey khanjar guzar gayi
Āyi sadā na pūch jo hum par guzar gayi
Sad shukr jo guzar gayi behtar guzar gayi
Sar kat gaya hamey tou alam se firāgh hai
Gar hai tou bas tumhāri judāyi ka dāgh hai
Hādn āshiqon Hussain ke āh o buka karo
Zahra ka sāth do madad e Mustafa karo
Haqq e mohabbat e Shahe wāla ada karo
Be sar huwe Hussain qayāmat bapa karo
Samjho sharīk e majlis e mātam Rasūl ko
Sab milke dou Hussain ka pursa Batūl ko
Bas ay Anees za’uf se larzān hai band band
Ālam mein yādgār raheinge ye chand band
Tapke qalam se za’uf mein kya kya buland band
Ālam pasand lafzein hain sultān pasand band
Ye fasl aur ye bazm e aza yādgār hai
Pīri ke walwale hain khiza ki bahār hai
Mīr Anīs in a group
ASHA: Blast From The Past 